?>

DAIŞê li Kerkûkê êrişî bîrên petrolê kir

DAIŞê li Kerkûkê êrişî bîrên petrolê kir

Îro hejmarek çeteyên DAIŞê êrişî zeviyeke petrolê li Kerkûkê kirin û hewl dan bîrên petrolê biteqînîn, lê di navbera wan û hêzên Iraqî de pevçûn derket û di encamê de polîsek hat kuştin.

ABNA24 : Li gor zanyariyên Rûdawê, çeteyên DAIŞê li navçeya Ezîziyê êrişî zeviyên Bay Hesen ên petrolê kirine.

Peyamnêrê Rûdawê li Kerkûkê, Herdî Mihemed ragihand, zêrevanên bîrên petrolê rûbirûyê çeteyên DAIŞê bûne û di navbera herdu aliyan de şer derketiye û di encamê de, polîsek hatiye kuştin û polîsekî din jî birîndar bûye.

Peyamnêrê Rûdawê diyar kir, polîsê ku di êrişa DAIŞê de hatiye kuştin, navê wî Şukir Mehmûd Teha ye û polîs birîndar jî navê wî Muezez Elî Husên e û herdu kes jî xelkê gundê Bay Hesen in.

Bay Hesen bi dûriya pênc kîlometran dikeve başûrê qezaya Dubiz a Kerkûkê.

Meha bihorî jî DAIŞê du caran êrişî ser bîrên petrolê yên li Bay Hesen kiribû. Kompaniya Nefta Bakur a ser bi hikûmeta Iraqê ve wê demê ragihandibû ku du bîrên petrolê li Bay Hesen li parêzgeha Kerkûkê rastî êrîşeke terorîstî hatine.

Di demên dawiyê de liv û tevgerên çeteyên DAIŞê li sînorê parêzgeha Kerkûkê û navçeyên ku dikevin navbera pêgehên hêzên Iraqê û hêzên Pêşmerge, zêde bûne.

Destpêka meha Gulanê çeteyên DAIŞê li sînorê nahiyeya Pirdê û li nêzîk gundê Qayebaşî êrişî xaleke hêzên Pêşmerge kiribûn û di navbera wan de şer derketibû. Di encama wê êrişa DAIŞê de, 3 pêşmerge canê xwe ji ddest dan û 2 pêşmerge jî birîndar bûn.

Ew xala hêzên Pêşmerge ku rastî êrişa DAIŞê hat, nêzîkî sengereke artêşa Iraqê ye û dikeve nêzîk bilindahiyên Zurgezirav û Şêrawe.

Di heman rojê de DAIŞê li rojavayê parêzgeha Kerkûkê çend êriş li dijî hêzên artêşa Iraqê û Polîsê Federalî yê Iraqê pêk anîbûn.

342/


Raveya Xwe Bişênin

Posteya Eletronîkî ya We Nayê Weşandin. … Pêwist bi * Hatine Nîşankirin

*